अपना खेतवा सिवनिया
गोदि में होरिलवा लेई माथे धइ घरिलवा,
धनिया चsलि दीहलि,
अपना खेतवा सिवनिया धनिया चsलि दीहलि।
डेगे-डेगे जालि धइ पतरी डगरिया,
सोहेला बदनिया प धानी रंग चूनरिया,
रूनुझूनु बाsजेले पाँव-पयजनिया, धनिया चsलि दीहलि
अपना खेतवा सिवनिया धनिया चsलि दीहलि।
झूरु-झूरु बहेला पवन पूरुवईया,
डोलेले कमरिया जइसे नदि बीच नईया,
बड़ा नीक लागेला कमर-करधनिया, धनिया चsलि दीहलि
अपना खेतवा सिवनिया धनिया चsलि दीहलि।
सगरो सिवनिया सरसोईया फुलाईल,
गोरि कs टिकूलिया में जिया अझुराइल,
करले गुलेल उनका नाके क झुलनिया, धनिया चsलि दीहलि
अपना खेतवा सिवनिया धनिया चsलि दीहलि।
