लेके रंगवा गुलाल, होरिया में आव ना सजनवां।
चढ़ते फगुनवां जागल मोरा असरा,
तोहसे मिलन के लागल मोरा असरा,
दिनवां गीनत बीते साल, होरिया में आव ना सजनवां।
लेके रंगवा गुलाल, होरिया में आव ना सजनवां॥
देवरा बा लरिका ऊ कुछऊ ना जनेला,
खुबे जीदियाला एगो बतियो ना मानेला,
भइल बाटे जिया के जवाल, होरिया में आव ना सजनवां।
लेके रंगवा गुलाल, होरिया में आव ना सजनवां॥
केतने फगुनवां बितल बिना तोहरा,
आई के लगाव रंग बन जिन निठोहरा,
तनी हमरो कईलs खियाल, होरिया में आव ना सजनवां।
लेके रंगवा गुलाल, होरिया में आव ना सजनवां॥
0 comments:
Post a Comment