रुनुक झुनुक बाजै पायल तोर पँउआ,
बड़ा नीक लागै ननद तोर गँउआ, बड़ा नीक लागै
देवरा निहारै पीपर झरै पाती
हमरी उमिरिया फरै दिन-राती
गरवा में नेहिया के लागत गरँउआ
देवरा निहारै पीपर झरै पाती
हमरी उमिरिया फरै दिन-राती
गरवा में नेहिया के लागत गरँउआ
बड़ा नीक लागै ..….........
कोंइया खिलै मोरे मन के तलइया
भँवरा भइल बा ननद तोर भइया
रहि-रहि पुकारेला नान्हे के नँउआ
बड़ा नीक लागै ..….........
भोरहीं सिवाने में बिरहा सुनाला
साँझे दलानी में रमायन गवाला
ससुरू गढ़इता के 3 बाजे खँड़उआ,
बड़ा नीक लागै ..….........
घरवा के पच्छिम आम के बगइचा
पुरुब पड़ोसिन बिछावैं गलइचा
अँगना में निबिया कै झखनार छँउआ
घरवा के पच्छिम आम के बगइचा
पुरुब पड़ोसिन बिछावैं गलइचा
अँगना में निबिया कै झखनार छँउआ
बड़ा नीक लागै ..….........
उत्तर निहारीं त नइहर देखाला
दक्खिन पहाड़े क झरना सुनाला
बहतै सुहावत बा पंथी के ठँउआ
बड़ा नीक लागै ..….........
0 comments:
Post a Comment